बनेपा: काभ्रेमा प्रतिनिधिसभा र प्रदेशसभाको निर्वाचन शान्तिपूर्णरुपमा सम्पन्न भएको छ। जिल्लामा रहेका एक सय ८९ मतदानस्थलको ३ सय ५० मतदान केन्द्रमा  शान्तिपूर्ण मतदान भएको प्रमुख निर्वाचन अधिकृत अर्जुन अधिकारीले जानकारी दिए। 

उनका अनुसार काभ्रेमा ६५ प्रतिशत मत खसेको छ। जिल्लाका विकट क्षेत्रहरु कोशीपारी, डाडाँपारीका मतपेटीका बिहीबार ल्याउन असम्भव भएकाले शुक्रबार साँझसम्ममा सम्पूर्ण मतपेटिका आईपुग्ने जानकारी दिए। सदरमुकाम धुलिखेल नजिक र यातायातको पहुँच पुगेका मतदान केन्द्रका मतपेटिका भने मतदान सकिएलगत्तै सदरमुकाम ल्याउन सुरु गरिएको प्रमुख निर्वाचन अधिकृत अधिकारीले बताए। उनले सबै मतपेटिका सदरमुकाम ल्याइसकेपछि सर्वदलीय बैठक राखेर मतगणना सुरु गर्ने बताए।

२ लाख ७२ हजार २ सय ९२ मतदाता रहेको काभ्रेमा दुई प्रतिनिधिसभा सदस्य र चार प्रदेशसभा सदस्यका लागि वाम गठबन्धन र लोकतान्त्रिक गठबन्धनका उम्म्मेदवारहरु चुनावी प्रतिस्पर्धामा छन्। प्रमुख जिल्ला अधिकारी शिव प्रसाद सिंखडाले मतदानलाई शान्तिपूर्ण बनाउन राजनीतिक दल, कर्मचारी, मतदाता र सुरक्षा निकायले महत्वपूर्ण सहयोगी भूमीका खेलेको बताए।