फिदिमरः पाँचथरमा मतगणना सुस्त भएको भन्दै आलोचना हुन थालेको छ। बिहीबार बेलुका पाँच बजेदेखि दुई ठाँउबाट प्रतिनिधिसभा सदस्यको मतणना सुरु गरिए पनि शुक्रबार बिहान १० बजेसम्ममा १५ हजार ६०५ मत मात्र गणना गरिएको हो।

मतगणना अत्यन्तै सुस्त भएपछि तीन ठाँउबाट गणना सुरु गरिएको छ। पाँचथरमा  ७७ हजार ८०३ मत खसेको हो। प्रतिनिधिसभा सदस्यको मतगणना सकिएपछि मात्र प्रदेशसभा सदस्यको मतगणना गरिने भएको छ। शनिबार रातिसम्ममा प्रतिनिधिसभा सदस्यको मत गणना सम्पन्न गर्ने गरी तयारी गरिएको मुख्य निर्वाचन अधिकृत मनोज केसीले जानकारी दिए। 

जिल्ला समन्वय समिति पाँचथरको कभर्डहलमा गरिएको मतगणनामा अहिलेम्मको नजितामा वाम गठबन्धबाट एमालेका उम्मेदवार बसन्त नेम्वाङले अग्रता लिएका छन्। नेम्वाङले सात हजार चार सय ५१ मत पाउँदा काँग्रेसका भीष्मराज आङ्दम्बेले पाँच हजार आठ सय तीन मत पाएका छन् ।

संघीय समाजवादी फोरमका प्रेमराज लावतिले तीन सय २३ मत, संघीय लिम्बुवानका सागर केरुङले दुई सय ७९ मत पाएका छन्। त्यस्तै मालेका दिनानाथ घिमिरेले दुइ सय ४१ मत, घर चिन्हका भगिरथ लिम्बूले १८५ मत पाएका हुन्। १५ हजार ६ सय ५ मतगणना गर्दा एक हजार ४०५ मत बदर भएको छ।