गाईघाट : उदयपुरमा दिउँसो १ बजेबाट मतगणना सुरु हुने भएको छ । बिहान ८ बजे बसेको सर्वदलीय बैठकले १ बजेबाट गणना सुरु गर्ने निर्णय गरेको हो । २ प्रतिनिधिसभा र ४ प्रदेशसभा रहेको उदयपुरमा मतगणनाका लागि त्रियुगा माध्यमिक विद्यालय गाईघाटको ६ वटा कोठामा व्यवस्था मिलाइएको छ । शुक्रबार बिहान ४ बजेसम्ममा जिल्लाका ९८ मतदान स्थलका २ सय ३३ मतदान स्थलबाट मतपेटिका ल्याउने कार्य सकिएकाले दिउँसो २ बजेबाट गणना कार्य सुरु गर्न लागिएको प्रमुख निर्वाचन अधिकृत तेजेन्द्रप्रसाद शर्मा सापकोटाले जानकारी दिए । 

उनकाअनुसार गणनालाई पारदर्सी र व्यवस्थित गर्न ६ वटै कोठामा सिसी क्यामेरा जडान गरिएको छ । त्यसैगरी सबै कोठामा तारजाली लगाइएको छ । मतपत्र सुरक्षित गर्न दलहरुलाई तारघेरामा राखि गणना गरिने छ । सापकोटाकाअनुसार प्रतिनिधि र प्रदेशसभाको एकैपटक अलग अलग कोठाबाट गणना गरिने छ । प्रत्यक्षतर्फका सकिएपछि समानुपातिक गणना गरिने जनाइएको छ । 

निर्वाचन आयोगले दिएको ५ दिनको समयसिमाभित्र रहि ४ दिनभित्र गणना कार्य सकिने गरी तयारी गरिएको प्रमुख निर्वाचन अधिकृत सापकोटाले जानकारी दिए । 
यता स्थानीय प्रशासनले मतगणना कार्यलाई शान्त र भयरहित वातावरणबाट सञ्चालन गर्नका लागि सुरक्षा व्यवस्था कडा पारिएको जनाएको छ । प्रमुख जिल्ला अधिकार प्रदिपराज कँडेलले शान्तिपूर्ण वातावरणमा गणना सकिने जानकारी दिए ।  

बिहिबार सम्पन्न निर्वाचनमा उदयपुरमा ६१ प्रतिशत मत खसेको थियो । १ लाख ९३ हजार ९ सय १८ मतदाता रहेको जिल्लामा १ लाख १७ हजार ४ सय ४० मत खसेको थियो । निर्वाचनमा ६२ हजार २ सय ५३ जना महिला र ५५ हजार १ सय ८६ पुृरुष र अन्य १ जनाले मतदान गरेका थिए । स्थानीय तहको निर्वाचनलाई हेर्ने हो भने ४ हजार ३ सय ५१ मत कम झरेको छ । १ लाख ७६ हजार ४ सय ६९ मत रहेको स्थानीय तह निर्वाचनमा १ लाख २१ हजार ७ सय ९१ मत खसेको थियो ।

आयोगले स्थानीय तह निर्वाचन लगत्तै मतदाता नामावली संकलन अभियान सुरु गरेपछि जिल्लामा १७ हजार ४ सय ४९ मत बढेको थियो । स्थानीय तहमा ७० प्रतिशत मत खसेको थियो । जुन अहिलेभन्दा ९ प्रतिशतले बढि हो । जिल्ला सुरक्षा समितिले जिल्लाका १५ वटा बुथ अति सम्बेदनशिल ५३ वटा सम्बेदनशिल र ३० वटा सामान्य मानी त्यहीँ ढंगको सुरक्षा व्यवस्था मिलाई निर्वाचन गराएको थियो ।