बेनी: आइतबार सम्पन्न प्रतिनिधि र प्रदेशसभा सदस्य निर्वाचनमा म्याग्दीबाट ६१ प्रतिशत मत खसेको छ । बिहान ७ देखि साँझ ५ बजेसम्म भएको मतदानमा उक्त सँख्या मत खसेको जिल्ला निर्वाचन कार्यालयले जनाएको छ।

कार्यालयका निर्वाचन अधिकारी केदारनाथ पौडेलले समग्रमा जिल्लामा ६१ प्रतिशत मत खसेको जानकारी दिए। ‘यो वैशाखमा सम्पन्न स्थानीय तह भन्दा ६ प्रतिशतले कमी हो। सञ्चार सम्पर्क नहुँदा आधा दर्जन मतदान केन्द्रबाट विस्तृत विवरण भने आएन’, उनले भने ।

प्रतिनिधि सभातर्फ एक र प्रदेशसभा तर्फ दुई निर्वाचन क्षेत्र रहेको जिल्लामा बेनी नगरपालिकाबाट सबैभन्दा बढि ६६ प्रतिशत मत खसेको  छ। अन्नपूर्ण गाउँपालिकामा ५९, रघुगंगामा ६३, धवलागिरीमा ५६, मँगलामा ६१ र मालिकाबाट ५२ प्रतिशत मत खसेको जिल्ला निर्वाचन कार्यालयले जनाएको छ।

जिल्लाभर ७५ हजार ५ सय ३७ मतदाता रहेको जिल्लामा ७२ मतदानस्थलमा १०६ मतदानकेन्द्र निर्धारण गरिएको थियो। जिल्लामा प्रतिनिधि सभा तर्फ लोकतान्त्रिक गठबन्धनबाट कांग्रेसका खम्बीर गर्बुजा र लोकतान्त्रिक गठबन्धनबाट एमालेका भुपेन्द्र थापा चुनावी मैदानमा छ। त्यस्तै प्रदेशसभा क तर्फ लोकतान्त्रिक मोर्चाबाट राप्रपाका भीमप्रसाद गौचन र वाम गठबन्धनबाट माओबादी केन्द्रबाट विनोद केसी तथा प्रदेशसभा ख तर्फ लोकतान्त्रिक मोर्चाबाट अमलाल फगामी र वाम गठबन्धनबाट नरदेवी पुन चुनाबी मैदानमा छन्।