नुवाकोट: आइतबार सम्पन्न पहिलो चरणको प्रदेश र प्रतिनिधि सभा निर्वाचनमा नुवाकोट र रसुवामा उत्साहजनक मतदान भएको छ। नुवाकोटमा ७० र रसुवामा ८० प्रतिशत मत खसेको जिल्ला निर्वाचन कार्यालयले जनाएको छ। दुई सय ९२ मतदाता रहेको रसुवाको लाङटाङमा ६० दशमलव २७ अर्थात एकसय ७२ मत मात्र खसेको रसुवाका निर्वाचन अधिकारी नवीन खालिङले जानकारी दिए। 

मतदानको समय बिहान ७ देखि साँझ ५ वजेसम्म रहेपनि लाइनमा मतदाता वसिसकेपछि आधा घण्टा ढिलोसम्म मतदान सुचारु गरिएको नुवाकोटका प्रमुख जिल्ला अधिकारी वीरेन्द्रकुमार यादवले जानकारी दिए । नुवाकोटका दुई सय ६० र रसुवाका ४५ मतदान केन्द्रमा मतदान कार्य शान्तिपूर्ण रुपमा सम्पन्न भएको जिल्ला प्रशासन कार्यालयले जनाएको छ। 

प्रतिनिधिसभा सदस्यका लागि दुई र प्रदेशसभा सदस्यका चार सिटका ४६ जना उम्मेदवार रहेको नुवाकोटमा र एउटा प्रतिनिधि सभा र दुई प्रदेश सभा रहेको रसुवामा २३ जना उम्मेदवार चुनावमा प्रतिस्पर्धामा छन् ।