नुवाकोट : नुवाकोटको विभिन्न स्थानमा एकसय वर्ष उमेर नाघेका वृद्धावृद्धाले मतदान गरेका छन्।  वेलकोटगढी नगरपालिका,  ककनी र सुर्यगढी गाउंपालिकामा तीन जना वृद्दवृद्धाले आइतबार मतदान गरेका हुन्। 

नुवाकोटको पूर्वी भेगमा रहेको ककनी गाउँपालिका वडा नं. ८ की ११६ वर्षीया वृद्धा बाटुली लामिछानेले आइतबार प्रदेश  तह तथा प्रतिनिधि सभाको निर्वाचनमा मतदान गरिन् ।  उनले ककनी गाउँपालिका-८ मात्रागाउँमा रहेको अरुणोदय मावि क मतदान केन्द्रबाट मतदान गरिन्।

 उनले छोरा नेत्रप्रसाद लामिछानेको सहयोगमा मतदान गरेकी हुन्। १९५९ साल चैत्र १० गते जन्मेकी लामिछानेले मत दिएपछि मुलुकमा स्थायी शान्ति र विकास आउने आशा व्यक्त गरिन्। 

नुवाकोटको पूर्वी भेगमा रहेको वेलकोटगढी नगरपालिका वडा नं. १ शेराभन्ज्याङमा आइतबार एकसय तीन वर्षीय महनकुमारी पुडासैनीले मतदान गरिन्।  उनले देशमा आफ्ना छोरा नाती पुस्ताले स्यायी शान्ति शान्ति देख्न पाउन् भनेर मतदान गरेको बताइन्।
 
नुवाकोटकै सुर्यगढी गापा वडा नं. ३ वागेश्वरीका एकसय एक वर्षीय अनन्तप्रसाद अधिकारीले पनि आइतबार प्रदेश तह तथा प्रतिनिधिसभा निर्वाचनमा मतदान गरे। उनलाई मत हाल्न उनका नाती समुन्द्रबाबु अधिकारीले सहयोग गरेको जिल्ला निर्वाचन कार्यालय नुवाकोटले जनाएको छ।