तुलसीपुर : प्रधानमन्त्री एवं नेपाली कांग्रेसका सभापति शेरबहादुर देउवाले वाम गठबन्धनको उद्देश्य वर्तमान संविधान खारेज गर्ने रहेको दावी गरेका छन्। बुधबार दाङमा भएको चुनावी सभामा सभापति देउवाले वाम गठबन्धनका नाममा एमाले र माओवादी केन्द्रले 'तानाशाही, एकतन्त्रीय शासन व्यवस्था ल्याएर संविधान खारेज गर्दै देशमा अधिनायकवाद लाद्‍न खोजेको' आरोप लगाए।

लोकतन्त्र रक्षा गर्ने अवस्था आएको तर्क गर्दै देउवाले समावेशी संविधान रक्षामा जुट्न सबैलाई आग्रह गरे। 'लोकतन्त्र बचाउने कि एकात्मक सत्ता दिने? जनताले सोच्नु पर्छ', उनले भने, 'लोकतन्त्र बचे हामी सबैको हित हुन्छ, अधिनायकबाद आए पाएको उपलब्धी गुम्छ। संविधान खारेज हुन्छ र लोकतन्त्र समाप्त हुन्छ।'

नेपाली जनता अधिकारका लागि पुनः लड्नु पर्ने भन्दै त्यस्तो अवस्था आउन नदिन लोकतन्त्रलाई बचाई राख्ने जिम्मा जनताको भएको उनले बताए। कांग्रेसले मात्रै लोकतन्त्रको रक्षा र देशमा सम्वृद्धि ल्याउन सक्ने उनको दावी छ।

कांग्रेसका वरिष्ठ नेता रामचन्द्र पौडेलले वाम गठबन्धनलाई नेपाली लोकतन्त्रवादी जनताले 'चुनाव मार्फत देखाइदिने' बताए। 'नेपाली जनता लोकतन्त्रको पक्षमा छ', उनले भने, 'वाम गठबन्धनको चुरीफुरी नेपाली जनताले चुनावमार्फत मेटाइदिनेछन्।'