• निर्वाचन समाचार
advertisement

मतपेटिकाको सुरक्षा : रातमा पुरुष, दिनमा महिला

दिल शिरीष | बिहिबार, १४ मङि्सर २०७४

प्रदेश ४ वाग्लुङ


मतपेटिकाको सुरक्षाका लागि खटिएका महिला नेता कार्यकर्ताहरू।

बागलुङ : गत आइतबार सम्पन्न चुनावका मतपेटिका कुर्न राजनीतिक दलहरूले फरक फरक टोली बनाएका छन्। मतपेटिका सुरक्षाका लागि भन्दै मुख्य निर्वाचन अधिकृतको कार्यालयमा आ-आफ्ना ताला लगाएका दलहरूले बाहिरी घेरामा बसेर मतपेटिका कुर्न कार्यतालिका बनाएका छन्।

दलहरूले सबैको सहभागितामा मतपेटिका कुर्ने व्यवस्था मिलाएको कांग्रेस जिल्ला सचिव नवराज पौडेलले बताए। दैनिक कुरुवा बस्ने क्रममा दलहरूले दिउसोको समयमा महिला र रातको समयमा पुरुष कार्यकर्तालाई खटाएका छन्।

महिलाहरूले आफूहरूले पनि मतपेटिका कुर्न पाउनु पर्ने आवाज उठाएपछि दिउँसोको समयमा महिलाहरूलाई कुर्न लगाइएको हो। ‘ताला समेत लगाएको स्थानमा प्रहरी कर्मचारी सबैले कुरिरहेका छन्’, कांग्रेस सचिव पौडेलले भने, ‘विश्वासको संकटका कारण दलहरूका प्रतिनिधि राखेर मतपेटिका कुर्नु परेको हो।’ पौडेलले सबै दलहरूले प्रतिनिधि राखेपछि कांग्रेसले पनि बाध्य भएर मतपेटिका कुर्न प्रतिनिधि खटाउनु परेको बताए।

उता वाम गठबन्धनले 'सत्ताको दुरुपयोग गरेर संस्थागत धाँधली गर्ने खतरा देखिएकाले' मतपेटिका सुरक्षाका लागि ताला लगाएर कुरुवा राख्न बाध्य भएको दावी गरेको छ। गठबन्धनले बिहान बेलुकीका लागि पुरुष महिलाको छुट्टाछुट्टै सूची बनाएर सर्कुलर गरेको राष्ट्रिय जनमोर्चाका सदस्य थानेश्वर सुवेदीले बताए।

मतपेटिका कुर्न गठबन्धन सम्बद्ध दलका सबै तहका संगठनहरूको सहभागिता गराउन खोजिएको सुवेदीले बताए। निर्वाचन आयोगको अनुरोध अनुसार नै दलका नेता कार्यकर्ता राखेर मतपेटिका कुरिएको उनको भनाई छ। दलहरूमा आपसी सहमति र विश्वासको वातावरण रहे पनि निर्वाचनसँग जोडिएको विषय भएकाले कुर्नु परेको एमाले जिल्ला उपाध्यक्ष कृष्ण पाठकको भनाई छ।

दलहरूले मतपेटिका सुरक्षाका लागि छुट्टाछुट्टै ताला लगाएका छन्। बागलुङ क्षेत्र नम्बर १ मा निर्वाचन आयोग सहित एमाले, माओवादी केन्द्र र राष्ट्रिय जनमोर्चाले ताला लगाएका छन् भने बागलुङ क्षेत्र नम्बर २ मा आयोग सहित माओवादी केन्द्र र राष्ट्रिय जनमोर्चाले आ–आफ्ना ताला लगाएका छन्।

मुख्य निर्वाचन अधिृकत प्रकाशप्रसाद पण्डितले दलको नेतृत्व र उम्मेदवारको चाहना अनुसार नै ताला लगाएर मतपेटिका भण्डारण गरिएको बताए। ‘निर्वाचन अधिकृतको कार्यालयले आवश्यक सुरक्षा गरिरहेको छ, उहाँहरूको चाहना समेत भएकाले ताला लगाउन दिएका हौं’ पण्डितले भने, ‘चौविसै घण्टा उहाँहरूकै उपस्थितिमा कुरुवा पनि गरिएको हो।’ गत स्थानीय निर्वाचनमा ६८.७७ प्रतिशत मत खसेको बागलुङमा गत आइतवार भने ६५ प्रतिशत मात्र मत खसेको छ।

कांग्रेसको उजुरी

नेपाली कांग्रेस बागलुङले जिल्लाका तीन मतदान स्थलमा बुथ कब्जा भएको भन्दै उजुरी दर्ता गरेको छ। वाम गठबन्धनले बुथ कब्जा गरी धाँधली गरेको आरोप लगाउँदै कांग्रेसले मंसिर १० गतेको निर्वाचन सकिएको चार दिनपछि बिहीबार उजुरी दर्ता गराएको हो। 

जिल्लाको बरेङ गाउँपालिकाको धुल्लुबास्कोट, जैमिनी नगरपालिकाको पैयुथन्थाप र बागलुङ नगरपालिकाको भकुण्डेमा एकलौटी मतदान गरेको भन्दै कांग्रेस जिल्ला सभापति तथा क्षेत्र नम्बर १ (क) का उम्मेदवार दीपेन्द्रबहादुर थापा र प्रदेश २ का उम्मेदवार प्रकाश शर्मा पौडेलले उजुरी दर्ता गराएको मुख्य निर्वाचन अधिकृतको कार्यालय बागलुङले जनाएको छ।

वाम गठबन्धनका स्थानीय नेता कार्यकर्ताले आफ्ना एजेन्टलाई धम्की दिएर धाँधली गरेकोले पुनः निर्वाचन गराउन उजुरीमा माग गरिएको छ। उम्मेदवार थापाले भकुण्डे र शर्माले अन्य दुई स्थानमा बुथ कब्जा भएको दावी गरेका छन्।

कांग्रेसका एजेन्टलाई हातपात गरेको, एकलौटी रुपमा कब्जा गरेर मतदान गरेको आरोप लगाएर निवेदन आएको मुख्य निर्वाचन अधिृकत प्रकाश प्रसाद पण्डितले बताए। ‘उजुरीका विषयमा निर्वाचन आयोगमा जानकारी गराइसकिएको छ,’ मुख्य निर्वाचन अधिकृत पण्डितले भने, ‘मतदान अधिकृतहरुको प्रतिवेदन र उजुरीलाई एकमुष्ठ आयोगमा पठाउने तयारी छ।’  

एमाले जिल्ला सचिव लालबहादुर थापाले निर्वाचन सम्पन्न भएको चार दिनपछि उजुरी पर्नु नियोजित भएको प्रतिक्रिया दिए। ‘यो हार मानसिकताको उपज हो,’ उनले भने, ‘जनताले जाहेर गरेको अभिमत माथि यसरी खेलवाड गर्नु दुखद हो, यसमा निर्वाचन आयोग पनि स्पष्ट हुन जरुरी छ।’

बागलुङमा एमाले, माओवादी केन्द्र र राष्ट्रिय जनमोर्चा गठवन्धन बनाएर चुनावी मैदानमा छन् भने कांग्रेस, राप्रपाको समर्थनसहित प्रतिस्पर्धामा छ।

प्रतिनिधि सभा १ मा कांग्रेसका तर्फबाट सहकारी तथा गरिबी निवारण राज्यमन्त्री चम्पादेवी खड्का र वाम गठबन्धनबाट एमालेका सूर्य पाठक प्रतिस्पर्धामा छन् भने यस क्षेत्रको प्रदेश १ मा कांग्रेसका दीपेन्द्र थापा र गठबन्धनका तर्फबाट एमालेकै इन्द्रलाल सापकोटा मैदानमा छन्। प्रदेश २ मा कांग्रेसका प्रकाश पौडेल र वाम गठवन्धनका तर्फबाट राष्ट्रिय जनमोर्चाका कृष्ण थापा चुनावी प्रतिस्पर्धामा छन्।

कमेन्ट गर्नुहोस्

अन्य समाचार


nepal_election_news

दाङमा समानुपातिकमा कांग्रेस पहिलो

प्रत्यक्ष निर्वाचन प्रणालीको नतिजा सार्वजनिक भएलगतै जिल्लामा सुरु भएको समानुपातिको मतगणना सम्पन्न भएको छ। प्रत्यक्षमा प्रतिनिधिसभामा कुनै सिट...

nepal_election_news

गच्छदार र चौधरीको कडा प्रतिस्पर्धा : भगवती ६२ मतले अगाडि

सुनसरी क्षेत्र नम्बर ३ बाट वाम गठबन्धनको तर्फबाट उम्मेदवार बनेकी एमालेकी भगवती चौधरी ६२ मतले अग्रता लिएकी छन्।...

nepal_election_news

भवानी खापुङ तेह्रथुमबाट दोस्रो पटक निर्वाचित

पूर्वसांसद भवानी खापुङ तेह्रथुमबाट प्रतिनिधिसभा सदस्यमा निर्वाचित भएका छन्। भौतिक पूर्वाधार तथा यातायता राज्यमन्त्री सीता गुरुङलाई खापुङले २...

nepal_election_news

गच्छदार र चौधरीको प्रतिस्पर्धा रोचक बन्दै : १६५ मतले भगवती अगाडि

सुनसरी क्षेत्र नम्बर ३ बाट वाम गठबन्धनको तर्फबाट उम्मेदवार बनेकी एमालेकी भगवती चौधरी १ सय ६५ मतले अग्रता...

nepal_election_news

कैलाली १ मा रेशम चौधरी २१ हजार मत अन्तरले विजयी

टीकापुर काण्डका प्रमुख अभियुक्त आरोपित रेशमलाल चौधरी कैलाली क्षेत्र नम्बर १ बाट प्रतिनिधिसभा सदस्यमा भारी मत अन्तरले विजयी...

प्रदेश ४ समाचार